كلمة الشاعر نزار فرنسيس في ساحة الشهداء في تظاهرة "#وحدا_الإنتخابات_بتنضّف" التي دعا اليها التيار الوطني الحرّ:
كلّ يللي عندو كرامة موجود بهالساحة اليوم.
بدي قول:
الحق الواضح بدّو رجال.
لازم يبقى بالبال.
كلمة يللي بتخاف تقولا.
هييّ اللازم تنقال.
اليوم هيدا الشعب لازم صوتو يوصل. وهيدا الشعب بحقلو يقول بدي انتخب انا.
بدي قول:
ليلك طوّل. اوعا تخاف من عتم النهاية.
ايدي بايدك قوم وقاف نكتب غير حكاية.
ابني وابنك اول فكرة. نحنا اليوم. وهنّي بكرا وشمس البكرا جايي.
غيّر. صلّح. اوعا تضلّ ساكت متلك متل الكلّ.
الغي أمسَك. قرّر نفسك. ساعد شمسك حتّى تطلّ.
ايدك مدّا. واللي قدا وضلّ تحدّا اوعا تفلّ.
كيف بترضى تكون الصمت وغيرك يحكي عنّك ويفكّر إنو استسلمت.
ساكتلو لأنك، صوتك ملكك والإيمان، حقّك لا تخلّي انسان يسرق حقّك منك.
لا تنده اطرش ما بيسمع. نحنا الدولة ونحنا الصوت. مش همّ عالموت منوقف ويوقع علينا الموت.
يعني القاتل لازم يقتل. والمش قابل لازم يقبل. جايي دورو وبدّو ينزل وبالآخر في نزلة موت.
ويكمل الشاعر نزار فرنسيس حديثه: الحق الواضح بدّو رجال. وانا شايف اليوم في كتير رجال قدامي.
ونشالله لبنان الجديد ينرسم بايديكم انتو. وبينكتب بصواتكم انتو.
الحق ما في يقاتل غير الباطل، لأنو الحق واحد.
ما في حرب بين حق وحق. في حرب بين حق وباطل. ونحنا الحق.