كلمة المحامي الدكتور زياد بيطار في مسيرة "كفى قتلاً" للمغدور جورج الريف:
بدي أتشكر باسمي وباسم عيلة جورج الريف كل واحد منكن حضر اليوم للمشاركة بالمسيرة تا نقول بأعلى صوت "كفى قتلا"، كفى للاستهتار بحياة الناس، كفى للبطش والعيش بالادغال وشريعة الغاب.
بتوجهلو وبقلو لجورج :
سامح كل واحد كان عم يتفرج انتا وعم تنقتل وما جرب يعمل شي
سامح هلبلد يلّي مش قادر يحمي الأوادم والطيبين لي متلك، يلّي ما بيحملو سلاح تا يحموا حالن من الأشرار
سامح الناس الطاغية لي كانت عم تحمي أمثال المجرم طارق يتيم لأنهم لا يدرون ماذا يفعلون، مش عارفين انّو بيوم من الايام رح يلقوا نفس المصير
سامح القضاء يلّي لو ما ترك أمتال هالمجرم بالسابق، ما كان انسنحلو فرصة تانية لممارسة اجرامو وعنفو، حتى بعد ارتكابو الجريمة بيتفاخر وبيقول أمام القضاء بأعلا صوتو "إنو مش نادم" .
بس منوعدك إنو دمك لي انطبع عل رصيف رح يطبع مسيرة "كفى قتلا"، مسيرة كل شخص بيدعي لمكافحة العنف والقتل والاجرام والفساد لي بيساهم بإعفاء المجرم على حساب الابرياء، المواطن عم بينقتل ألف مرة بالنهار، جسديا ومعنويا وروحيا،
التفلت الامني عم بينعكس عا أصحاب النفوس الضعيفة وعم يخليون يرتكبو الجرائم وينتسبوا لجماعات نافذة تا تحميون، شو المطلوب انو المواطن يحمل سلاح تا يدافع عن حالو بصورة فردية لأنو ما عم بيلاقي الحماية الامنية اللازمة من الدولة .
وضع السجون اللبنانية مذري، بدل ما يكون إلو دور إصلاحي، صار دورو تعليمي لوسايل إجرامية جديدة، التدخلات السياسية بالقضاء عم تقلب ميزان العدالة ببعض الأحيان وعم بيصير التوازن بين قوي و أقوى. بدنا قضاء يستمد قوتو من نفسو وما يسمع الا لصوت العدالة، يصدر احكام جريئة وعقوبات بحجم الجريمة المرتكبة لأن وراء كل بلد عظيم قضاء جريء وشريف.
منقلك يا جورج انه إنت قتلوك مرة هون بس نحنا كل يوم عم نموت مئة مرة،
"كفى قتلاً" ما بتعني بس الموت بالقتل، هي بتعبر عن كل مين مات عطشان من قلة المي وجيعان من قلة الأكل ومسموم من ريحة الزبالة
عطونا كهربا مش اشتراك كهربا، عطونا ماي مش صهاريج ماي، عطونا أمان مش جثث و خراب، عطونا علم و طبابة و سقف فوق راسنا، مش بيوت مهجورة ومهدومة، عطونا نضافة و بيئة صحيّة مش نفايات و أكل ملوّث، عطونا وظايف مش سبب للهجرة عبلاد الإغتراب، عطونا دعم وإهتمام بالشباب و الرياضة لمصلحة وطنية مش لمصلحة شخصية،
رح تشوفوا اليوم من بعد هل الظلم المستشري ثورة الأحياء والشهداء، ثورة الأقلام والمعاول، ثورة الإيمان يلي بتغلب عاصفة الخراب والقتل والظلم والدمار، وثورة الشعب اللبناني الحر المناضل، هيدي الثورة يلي أنتجت طلعت ريحتكم وبدنا نحاسب بمحكمة الشعب .
وصلنا ع حفة الهاوية، من بعد ما كنّا عم نصدّر كهرباء باﻟ 1978 صرنا عم نشحدها!
نحن من أغنى البلدان بالميّ وشعبنا عطشان. وبعدما غرق لبنان بالفراغ والفلتان، بالعتمة وبالشحّ هلق عم يغرق بالزبالة!
لبنان، بلد السياحة الأول بالشرق الأوسط مش قادر يصرّف نفاياته وبدل ما تكون مصدر إنتاج صارت مصدر تلوّث وأمراض. الحل الوحيد الصحيح هوي إعطاء البلديات حقوقها المسلوبة تتعالج كل منطقة نفاياتها مش يعملولنا عكار زبالة، هيك بيتحول العبء لفرصة إنماء. صار وقت الشعب ينتفض ويقول كلمته! صار وقت الحكم يرجع لأصحابه! من هون وبهدف انجاح الثورة يلي بلشوا فيها الشباب من ساحة رياض الصلح أنشأنا محكمة الشعب. واليوم منحطها قيد التنفيذ بأوّل حكم رح يصدر لإلها بموضوع الزبالة. من هلق ورايح الشعب رح يصدر حكمه بكل قضية بلبنان شباب وصبايا وإختصاصيين بكافة المجالات رح يلاقوا حلول لكل المشاكل الغرقان فيا وطنا. والشعب عبر محكمته هو يلي رح يحاسب، هو يلي رح يختار عن طريق الإستفتاء ليرتفع الصوت وتتحقق العدالة. قريباً جداً لا المحاكم القضائية ولا أي سلطة بلبنان رح تقدر تقوم بأي إجراء ظالم ما فيو عدالة لأنه رح تتحاكم قدّام محكمة الشعب. بهالمحكمة ما في ناس عم يقبضوا آخر الشهر معاشاتهن ولا في ناس متمسكين بمناصبهن ولا ناس خايفين لأنه هالمحكمة مألفة من نسيج الشعب يلي ما بقى عنده شي يخسره بدعي الجميع للمشاركة بالقرار وإبداء الرأي عبر محكمة الشعب على التواصل الإجتماعي (فيسبوك) .
منبارك الإنتفاضة الشعبية و منقلن إيدنا بإيدكن وإنه مهما إشتدّت الأزمة بنضالنا وإصرارنا رح نخلق لبنان جديد.
ورح نقلن طلعت ريحتكم ورح نحاسبكن بمحكمة الشعب .
عشتم و عاش الشعب اللبناني
المحامي الدكتور زياد بيطار