الأب انطوان خضرا: نتبهو مش عم نمزح..

 - مرجع بوزارة يتصّل بمرجعية روحية ويعطيها معلومات مغلوطة

- يمكن مش عارفين مين نحنا.. أكثر من هيك ما في استفزاز
- المشكلة عند الشريك بالوطن..

إعتبر رئيس مؤسسة "لابورا" الأب انطوان خضرا في اتصال هاتفي بقناة الـ"otv" أنّ صرخته تهدف للإضاءة على الخلل والخطأ، وقال: المسألة ليست مسألة شخصية. أو مصالح سياسية. نحنا اليوم صرنا 3 اسابيع عم نضوي على الموضوع وما في ايّ مبادرة بالمقابل بتجي تقلنا تعو يا جماعة تعو اقعدو على الطاولة نحكي.

يعني مش بس عم تنهضم حقوقنا ويُعتدى علينا. ما بدن يحاورونا.

وهنا اتوجّه بكلامي لجميع المسؤولين الروحيين والسياسيين. إذا مش قابضينا جدّ يقولولنا.

نحنا جديين اكتر ما بيتصورو.

هيدا الموضوع ما رح نتركو. بدنا جواب.

ما حدا يحاول يعمل عملية التفاف على صرختنا. وما حدا يحاول يقنع أطراف.. منطلب من الكلّ يوعوا على هيدي المسألة.

من 15 سنة، منحكي عن المشاكل. بيجي القيادات الروحية عنّا والقيادات السياسية بيطلبو منّا نروق. نوقّف الإعلام. نوقّف البيانات. نوقّف المؤتمرات الصحافية. وهذا ما فعلناه.

ولكن عم يللي عم نسمعو، انو مرجع بوزارة عم يتصّل بمرجعية روحية ليقول لها كلّ ما قيل هي ارقام خاطئة. لا يوجد غبن عند المسيحيين. لا بل ينهو حديثهم، لأنو الأفضل ما نحكي شو عم نصير، لأنو مش لمصلحة المسيحيين.

كأنو فيشي فضيحة عند يللي شالولن من مراكزهم. هيدي الأمور ما بتمرق علينا.

ما بجوز هيدا الإستهتار بالشريك بالوطن. عملو معروف سمعو.. قبل ما يفوت الأوان.

نحن موحدون

ورداً على سؤال عمّا إذا كانوا المسيحيين (أحزاب وقوى) موحدين لتحقيق هذه المطالب الواضحة بخصوص المناصفة وعدم سلب حقوق المسيحيين، يقول الأب خضرا: نعم نحن موحدين، ولكن المشكلة هيي عند الشريك بالوطن، مش عم يعتبر انّو صرختنا محقّة. وعم يعمل كل الطرق انّو كل الكلام الذي قيل غير سليم.

اليوم أنا جيت قلت بوسائل الإعلام، وإذا حكينا عن وزارة المالية أو وزارة الأشغال أو اي وزارة، وكلامنا ليس موجّه لوزير او طائفة، في وزارة المالية عدد المسيحيين 33% مش نص بنص. لو كانت الفئة التانية والتالتة نص بنص لقلنا ذلك. إضافة الى ذلك هناك أهمية المراكز..

وبدّي قول شغلي مهمي: بعد 4 او 5 سنين، بس يطلعو الفئة التانية أو التالتي المسيحيين على التقاعد، مين بدن يجيبو محلن.

ما رح يلاقو مسيحيين محلن.

ما عم افهم كلّ الصريخ من بكركي و"لابورا" والأحزاب، والمقالات والحديث في الإعلام، كلّو ما قلو أساس..!!

يمكن منون عارفين مين نحنا منمثّل بالمجتمع المسيحي؟ بس نحنا منقلن تلقفو الصرخة وكونو ايجابيي أحسن ما نروح لغير خطط.. لأنو ما بجوز بهيدا البلد تكون في تهميش لأنو رح تودّي لثورة.

وعن موقف رئيس الحكومة تمام تمام سلام ورئيس مجلس النواب نبيه بري، قال الأب انطوان خضرا: ما جاوبونا. رفضوا فتح الموضوع بمجلس الوزرا يوم الثلاثا الماضي. طالبنا الوزراء لمسيحيين اثارة الموضوع، وطلعت الوزيرة اليس شبطيني بقلب الإجتماع فتحت الموضوع ورئيس الحكومة تمام سلام رفض يفتحو. وحكينا الرئيس فؤاد السنيورة وحكينا كلّ المرجعيات. ومنتمى يقبضو الموضوع بجدّ، إذا بهمون شركاؤن بالبلد.

أكتر من هيك استفزاز ما في.

الرئيس نبيه بري جاوب "الكنيسة" انو هوي حريص، وبلغنا انو رح يطلب من الوزير انّو يوقّف التعيينات. بس نحنا ما عم نقول عن وزارة ووزير، في نهج بدّو يتصحح.

هناك حالة عامة بدها حل. والاّ رح نضطر نطلع بالهوا، ونجيب كبار المُكلفين وكل المسيحيين يللي براجعونا وننقل معاناتهم على الهوا قدام الناس. وكل واحد يتحمّل مسؤوليتو.

وفي وزارات مصيرية.. متل وزارة المالية وتأثيرا على لبنان ككل. يا امّا كل الناس بتشارك، يا امّا في ناس ما رح تدفع ضريبة. وما رح يدفعو مال. نتبهو.

نتبهو مش عم نمزح.